Вториот циклус на мултимедијалниот настан „Клинци“ ќе се реализира в петок (28 февруари) во 20 часот во Јуроп хаус во Скопје. Станува збор за шесто издание на кое ќе бидат претставени четворица млади книжевници и една млада визуелна уметница.
На „Клинци“ ќе читаат: Филипа Сара Попова, Никола Наумовски, Бисера Стефановска и Емануела Ковачевска Китановска. Ќе биде отворена и изложба на фотографката Емилија Трајковска. Модератор на настанот ќе биде Андреј Медиќ Лазаревски.
– Некои луѓе ќе викнат, ќе крикнат: „Младите денес ништо не прават“, „Млади бездарници“ или, пак, „Денес младите се тапа“. Инспирирани, испровоцирани, поттикнати од таквите мудри изреки, ги започнавме книжевните читања наречени „Клинци“. Секое издание ве запознаваме со четворица автори кои се дел од младинската книжевна сцена, ве запознаваме со нивната поезија и проза, а секое издание ќе биде дополнето и со изложба! Ве очекуваме сите млади, но и повозрасни, клинци и неклинци – повелете! – велат организаторите.
